Եվրոպայի արժեթղթերի շուկաները հինգշաբթի աճ են գրանցել

Արևմտաեվրոպական երկրների ֆոնդային ինդեքսները հինգշաբթի առևտրի արդյունքներով աճել են՝ շնորհիվ Մերձավոր Արևելքում լարվածության թուլացման նշանների։

Եվրոպայի խոշորագույն ընկերությունների Stoxx Europe 600 համախառն ինդեքսն աճել է 0,52 տոկոսով՝ հասնելով 624,45 կետի։

Բրիտանական FTSE 100-ն ավելացել է 0,27 տոկոսով, գերմանական DAX-ը՝ 0,6 տոկոսով, ֆրանսիական CAC 40-ը՝ 1,15 տոկոսով, իտալական FTSE MIB-ը՝ 0,27 տոկոսով, իսպանական IBEX 35-ը՝ 0,55 տոկոսով։

Շուկային աջակցություն է ցուցաբերել ԱՄՆ պետդեպարտամենտի հաղորդագրությունն այն մասին, որ Իսրայելը և Լիբանանը Վաշինգտոնի միջնորդությամբ անցկացված բանակցությունների արդյունքում պայմանավորվել են պահպանել հրադադարի ռեժիմը և մտադիր են «վերսկսել քաղաքականության և անվտանգության հարցերի քննարկումը հունիսի 22-ից սկսվող շաբաթվա ընթացքում՝ համապարփակ համաձայնության հասնելու նպատակով»։

Իսրայելի հարվածները Լիբանանի ուղղությամբ առաջացնում են Թեհրանի դժգոհությունը։ Այս շաբաթ ավելի վաղ Իրանը սպառնացել էր դադարեցնել երկխոսությունը ԱՄՆ-ի հետ, եթե հարձակումները չդադարեն։ Հրադադարի վերաբերյալ պայմանավորվածության ձեռքբերումը կարող է նպաստել առաջընթացին Թեհրանի և Վաշինգտոնի միջև խաղաղ համաձայնագրի շուրջ բանակցություններում։

Լարվածության թուլացման նշանների ֆոնին նվազել է նավթագազային ընկերությունների շուկայական արժեքը, այդ թվում Equinor-ի՝ 1,5 տոկոսով, Repsol-ի՝ 1,8, Shell-ի՝ 1,2, BP Plc-ի և Eni-ի՝ 0,2, TotalEnergies-ի՝ 0,3 տոկոսով։

Ինչպես ցույց են տվել հինգշաբթի հրապարակված տվյալները, եվրոգոտում մանրածախ վաճառքները ապրիլին նախորդող ամսվա համեմատ նվազել են 0,4 տոկոսով՝ մարտին 0,8 տոկոս աճից հետո։ Տարեկան կտրվածքով ցուցանիշի աճը դանդաղել է մինչև 1 տոկոս՝ 2,1 տոկոսից։</p